Psalms 25

Kumwomba Mungu Uongozi Na Ulinzi

Zaburi ya Daudi.

1 ^aKwako wewe, Ee Bwana,
nainua nafsi yangu,
2 ^bni wewe ninayekutumainia,
Ee Mungu wangu.
Usiniache niaibike,
wala usiache adui zangu wakanishinda.
3 ^cKamwe hakuna hata mmoja anayekutegemea
atakayeaibishwa,
bali wataaibishwa
wafanyao hila bila sababu.

4 ^dNionyeshe njia zako, Ee Bwana,
nifundishe mapito yako,
5 ^eniongoze katika kweli yako na kunifundisha,
kwa maana wewe ni Mungu Mwokozi wangu,
nalo tumaini langu liko kwako wakati wote.
6 ^fKumbuka, Ee Bwana, rehema zako kuu na upendo,
kwa maana zimekuwepo tangu zamani.
7 ^gUsizikumbuke dhambi za ujana wangu
wala njia zangu za uasi,
sawasawa na upendo wako unikumbuke,
kwa maana wewe ni mwema, Ee Bwana.

8 ^h Bwana ni mwema na mwenye adili,
kwa hiyo huwafundisha wenye dhambi njia zake.
9 ⁱHuwaongoza wanyenyekevu katika haki,
naye huwafundisha njia yake.
10 ^jNjia zote za Bwana ni za upendo na uaminifu
kwa wale wanaoshika shuhuda za agano lake.
11 ^kEe Bwana, kwa ajili ya jina lako,
unisamehe uovu wangu, ijapokuwa ni mwingi.
12 ^lNi nani basi, mtu yule anayemcha Bwana?
Atamfundisha katika njia
atakayoichagua kwa ajili yake.
13 ^mMtu huyo atafanikiwa maishani mwake,
nao wazao wake watairithi nchi.
14 ⁿSiri ya Bwana iko kwa wale wamchao,
yeye huwajulisha agano lake.
15 ^oMacho yangu humwelekea Bwana daima,
kwa kuwa yeye peke yake ndiye ataitoa
miguu yangu kutoka mtego.

16 ^pNigeukie na unihurumie,
kwa maana mimi ni mpweke na mwenye kuteseka.
17 ^qShida za moyo wangu zimeongezeka,
niokoe katika dhiki yangu.
18 ^rUangalie mateso na shida zangu
na uniondolee dhambi zangu zote.
19 ^sTazama adui zangu walivyo wengi,
pia uone jinsi wanavyonichukia vikali!
20 ^tUyalinde maisha yangu na uniokoe,
usiniache niaibike,
kwa maana nimekukimbilia wewe.
21 ^uUadilifu na uaminifu vinilinde,
kwa sababu tumaini langu ni kwako.

22 ^vEe Mungu, wakomboe Israeli,
katika shida zao zote!